Margrét Rós

Besta hollustu kaka í heimi?

Á mánudaginn eru lokaskil hjá mér í risa áfanganum Inngangur að umhverfisfræðum. Æðisleg önn er að klárast og ég bakaði þessvegna uppáhalds kökuna mína... smá soul food sko (jafnvel gæti það hafa verið til þess að sleppa við blessað skrifborðið og tölvuna). Þegar maður er með rabarbarasultu mallandi á hellunni á sama tíma og maður skellir í deig fíla ég mig eins og súper domestic goddess! Ég get svo svarið það. Allavega.. þessi uppskrift er mjög einföld þó maður geri sultuna sjálfur en til þess að gera þetta enn léttara er auðvitað hægt að kaupa tilbúna sultu. Hin yndislega Sigrún (á www.cafesigrun.com) á heiðurinn en ég breytti henni pínu því ég átti ekki heslihnetur. Í staðinn notaði ég blöndu af valhnetum, möndlum og peakan hnetum. Það þægilega við það var að ég slapp við að taka hýðið af heslihnetunum.

Hér er uppskriftin hennar Sigrúnar - en eins og ég segi ég myndi ekki hika við að breyta samsetningunni á hnetunum ef þú átt ekki til rétta tegund inn í skáp. Ég mæli sérstaklega með að gera rabbabarasultuna sjálf, uppskriftina að henni má sjá hér.

Kakan er frábær. Mjúk og stökk á sama tíma... bæði sæt og pínu súr. Miklu betri en "venjuleg" hjónabandssæla, og miklu hollari!

Hér má sjá mynd af minni köku. Ég náði því miður ekki mynd af henni áður en við Einar stukkum á hana (þessi er s.s. líka í miklu uppáhaldi hjá honum) - ég lofa að hann borðaði megnið af henni en ekki ég!

Tried and tested *5/52*

Í síðustu viku prófaði ég þrjár uppskriftir af kökum/konfekti sem eru í hollari kantinu. Ein þeirra var ekki góð en hinar tvær heppnuðust príðilega.

Nr.1 - Kókoskúlur

Þessa uppskrift sá ég á pressunni hjá henni Mörtu Maríu en hún lumar oft á góðum uppskriftum.

100 gr haframjöl
100 gr múslí
50 gr döðlur
80 gr kókosmjöl

1 dl kókosolía (sem búið er að láta standa undir heitri vatnsbunu)
1 dl kakó
1 dl agave síróp

Innihaldsefnin í fyrsta hópnum eru sett í matvinnsluvél og þessu er blandað vel saman.
Innihaldsefnunum í seinni hópnum er þvínæst bætt við þurrefnin í matvinnsluvélinni. Þetta er unnið þangað til að komið er ágætis deig sem hægt er að hnoða í litlar kúlur. Ég velti svo kúlunum upp úr blöndu af sesamfræjum og kókosmjöli áður en þær fóru inn í ísskáp.

Þessar kúlur taka u.þ.b. 7 mín in the making og bragðast frábærlega!
--------

Nr. 2 - Orkuhnullungar

Þessa uppskrift fékk ég af bestu síðu í heimi, Cafe Sigrún. Ég breytti henni pínulítið en það var bara vegna þess að það sem að stóð í uppskriftinni átti ég ekki alveg til. Þessi vefsíða er þvílíka snilldin, ég skil reyndar ekki alveg metnaðinn sem hún Sigrún hefur fyrir þessu, en dáist engu að síður að henni. Ég myndi sko alveg kaupa mér aðgang en hún elsku Sigrún leyfir öllum að njóta! Ég mæli með öllu sem ég hef prófað af þessari síðu (og það er ekki lítið), bæði er það bragðgott og uppskriftirnar eru yfirleitt þannig að þær heppnast 100% ef þú bara fylgir þeim!

3/4 bolli spelti
1 bolli haframjöl, malað fínt í matvinnsluvél
1 tsk kanill
1/2 tsk múskat
1/2 tsk engifer
1/2 tsk negull (ég átti ekki negul svo ég notaði kardimommur.. nammi!)
1 tsk vínsteinslyftiduft
4 msk kókosfeiti
1/3 bolli rapadura hrásykur
2-4 msk sojamjólk
1/2 tsk himalayasalt
1 egg
1/4 bolli sesamfræ
1/3 bolli saxað súkkulaði. Ég blandið saman súkkulaði og cacoa nibs. Sjúklega gott!
1/2 bolli saxaðar hnetur, ég notaði peakan
1/3 bolli döðlur, má nota rúsínur líka

1. Ofninn á 180°C
2. Haframjölið er malað í matvinnsluvél þar til það er mjög fínt. Þá er hellt í skál ásamt spelti, kryddum, lyftidufti og salti. Öllu blandað vel saman.
3. Egg, kókosfeiti og hrásykurinn hrært saman. Ég notaði matvinnsluvél því ég elska vélina mína!
4. Eggjablandan er færð yfir í þurrefnaskálina og allt er hrært varlega saman með sleikju.
5. Hnetum, sesamfræjum, döðlum og súkkulaði er hrært út í.
6. Litlir orkuklumpar eru hnoðaðir og settir á plötu með bökunarpappír. Pressið létt á hverja köku (u.þ.b. 16 stk).
7. Bakað í 15 til 20 mín.

Mæli sko með þessum! Þær slógu í gegn.
-----------------

Þriðja uppskriftin kom líka af pressu Mörtu Maríu en sú sló ekki alveg eins mikið í gegn. Þetta er súkkulaði kaka sem er svaka holl. Sykurlaus og alls laus (næstum). Ég var enga stund að baka hana (skellti í hana á svona 10 mín) og svo þarf hún heldur ekki að vera það lengi í ofninum. Málið var bara að húsið ilmar eins og skúffukaka.... og þá langar þig bara í skúffuköku! Þetta var eiginlega ekki nógu djúsí. Ég myndi reyndar hugsanlega baka þessa köku aftur ef ég ætti að koma með eina köku í eitthvað boð þar sem ég vissi að væru bara smjör, rjóma, sykur drullukökur til boða. En eins og ég segi. Við borðuðum alveg eitthvað af henni yfir handboltanum síðustu helgi en hún náði einhvern vegin ekki að seðja súkkulaðihungrið. Ég ætla ekki að skrifa upp uppskriftina en hana má finna hér.

Eina kakan sem kláraðist ekki áður en ég náði að taka mynd :-)

Stærðfræði, matur, matvinnsluvél, myndir og páskarnir.

Síðustu vikuna hef ég komist að því að ég er skuggalega (og þá meina ég skuggalega) léleg í stærðfræði. Þegar ég get ómögulega klórað mig fram út stærðfræðidæmi (sem að ég á samt í rauninni að geta leyst) pirrast ég út í áhuga minn á umhverfisfræðum. Að ná fyrstu einkunn í ensku var nefninlega ekkert sérstaklega erfitt.

Til þess að hressa mig við í dag ákvað ég að gera eitthvað sem ég er góð í. Elda og baka hollt og gott! Einar er veikur heima og því ákvað ég að dekra extra vel við hann og baka muffins og hjónabandssælu og svo fékk hann að sjálfsögðu pasta með pestó í kvöldmatinn. Ég vígði jólagjöfina okkar. Hina stórkostlegu magimix matvinnsluvél sem að frábæru tengdaforeldrar mínir gáfu okkur. Ok ég get ekki lýst því hversu mikil snilld þessi vél er. Mig langar næstum því bara að elda eitthvað sem að þarf matvinnsluvél, hence mölun á hnetum og pestó.

Í öðrum fréttum er mest lítið. Ég er að íhuga að skipta um myndasíðu. Finnst pínu leiðinlegt við Flickr að fólk þarf að vera innloggað til að kommenta eða komast í lokuðu myndirnar mínar. Er að skoða smugmug sem að mér lýst frekar vel á. Gallinn við þá síðu er að ekki er hægt að hafa sumar myndir í albúmum lokaðar en aðrar opnar. Eða ég er allavega ekki búin að finna út úr því.

Við Einar erum svo líka að plana páskafríið okkar. Það er í rauninni eina fríið sem að ég fæ þangað til í júní fyrir utan hugsanlega langa helgi þegar ég fer yfir í næsta aldursflokk - 25. Við erum að hugsa um Egyptaland. Mér finnst Rauðahafið, sól, pýramidarnir og egypskur matur hljóma ótrúlega vel!

Smá svona

Og svolítið svona

Og heill hellingur af svona! 

Já, já þetta kemur allt saman í ljós :-) Gaman að hlakka til einhvers í þessum skítakulda hér í Stokkhólmi þessa dagana. Það er svo kalt að ég þarf að fara í úlpu, húfu og vettlinga til að fara út með ruslið!   

Helgin

Nýafstaðin helgi heppnaðist einstaklega vel.* Ég bakaði jólakökuna (vegan peakan súkkulaði pie) á laugardaginn og hún stóð undir væntingum. Ég þarf reyndar að gera örlitlar breytingar á henni fyrir aðfangadag en engar stórvægilegar (minna mót, minni banani). Ég fékk mér hálfa sneið til að smakka og "bar hana fram" með smá sýrðum rjóma on the side. Þetta finnst Einari stórskrítið en mér finnst frábært að fá smá súrt með sætri köku. Uppskriftina að þessari vegan snilld fékk ég úr Vegetarian times blaðinu. Ég hef aldrei skoðað þetta blað áður en sá um daginn 35 ára afmælis blaðið og ákvað að skella mér á eintak. Síðan þá (svona 3 vikur) er ég búin að skoða það reglulega og hreinlega slefa yfir öllu í því. Á einni opnunni eru líka myndir af gömlum blöðum, gaman að sjá Michael Jackson, ennþá svartan og vegerarian, á einni forsíðunni. Og svo aðra forsíðu með Paul og Lindu McCartney en í því tölublaði var fjallaðu um hvernig þau halda jólin. Og sem betur fer héldu þau jólin á vegan máda og þess vegna er Stella McCartney svona ógurlega umhverfismeðvituð og klár! Á jólagjafaóskalistanum í ár er áskrft að þessu blaði.

Í gærkvöld fórum við svo í Vaxholmen á jólahlaðborð. Það var nú meira ævintýrið. Fyrir ykkur þarna úti sem að eruð ekki alveg með skerjagarðinn í Stokkhólmi á hreinu þá er Vaxholm s.s. partur af honum. Þetta er hólmi/eyja fyrir N-Austan borgin. Þangað er bæði hægt að komast keyrandi eða með ferju. Til að hafa svolítið fúkt í þessu ákváðum við megnið af liðinu að taka ferjuna. Ég hringdi í gær upp í Vaxholm Hotel þar sem að hlaðborðið fór fram og spurðist fyrir um hvenær ferjan færi. Maðurinn í afgreiðslunni var voða næs og sagði að báturinn myndi fara klukkan 18:15... bara fyrir okkur níu.

Þegar við mættum niður á höfn rétt yfir klukkan 18 var enginn bátur sem leit út fyrir að vera fara eitt né neitt. Stelpurnar höfðu nælt í skottið á einhverjum skipstjóra sem að sagði okkur að hann væri einn á bryggjunni, hinir væru farnir heim og hann gæti ekki farið með okkur. Jáhá! Við vorum nefninlega ekki 7 fullorðin með tvö börn í vagni/kerru að KRÓKNA úr kulda úti á bryggju og bara 50 mínútur í að jólahlaðborðið byrji. Ég hringdi í hótelið og talaði við almennilega manninn sem sagði að hann hefði hringt og þeir hefðu ætlað að fara með okkur. Anyways. Við tókum taxa. Að taka taxa úti í eyju með tvö börn og tvær kerrur og sjö fullorðna er vesen. Og fáránlega dýrt! Við borguðum s.s. næstum 1600 SEK (maður getur sko farið í fína helgarferð til Parísar fyrir þann pening). Sem betur fer fór hann Einar og útskýrði fyrir almennilegu mönnunum að þetta gengi ekki... sérstaklega þar sem að enginn bátur var væntanlegur til baka um kvöldið svo að það leit út fyrir að við yrðum að taka taxa aftur til baka! Almennilegu mennirnir voru svo almennilegir að endurgreiða okkur taxann að fullu og bjóða upp á fyrstu drykkina. Við enduðum svo á því að taka strætó heim, sem var afskaplega skrautlegt, fyndið og skemmtilegt! Ég komst m.a. annars að því að ég er fáránelga góð í að hlaupa með þriggja ára barn í fanginu á eftir strætó. Gott kvöld í alla staði.

 

En nú er helgin búin og prófa/jólastressið er að hellast yfir mig. Ég á enn eftir eitt próf, fer heim daginn eftir og þá beint í vinnuna og fjölskyldu/vina hittinga. Ég er samt ekki enn búin að pakka inn einni einustu jólagjöf, bara búin að kaupa ca 5 og ekki búin að skrifa jólakort!! Ég á líka eftir að ákveða í hverju ég ætla að vera um jólin og kaupa skó. Úff ég finn bara stressið koma yfir mig. En það þýðir ekkert að væla, fram á föstudag get ég ekki spáð í þessu rugli, ég verð að læra efnafræði eins og enginn sé morgundagurinn!!

* Fyrir utan þetta blessaða lið sem að kærastinn minn (og ég) heldur með. Úff!

Austurlensk veisla

Síðustu jól var ég alveg ægilega ánægð með tvær bækur sem ég fékk í jólagjöf. Það voru matreiðslubækurnar hennar Yasmin Olsen. Nú eru næstum því komin önnur jól og ég var ekki enn búin að gera neitt úr bókunum! Ég lét því til skara skríða í gærkvöld.

Ég eldaði falafel, gerði hummus og spínat sósu allt úr Indversku bókinni.

Mynd fengin að láni af síðu brekku bókaútgáfu  

Þessu vöfðum við svo inn í fullkorn fjallaflatkökur (svona sænskar flatkökur.. voða góðar og sniðugar) með fersku spínati og agúrkustrimlum. Ég var með ágætlega háar væntingar og þessar uppskriftir stóðu sko alveg undir þeim. Ég ofsauð reyndar aðeins kjúkklingabaunirnar svo að það var pínu erfitt að ná falafel-inu í almennilegar kúlur en heilhveiti speltið reddaði því. Mér fannst líka full mikill sítrónusafi í hummusnum. En þetta var svaka bragðgott og ég mun klárlega gera eitthvað úr þessari bók fljótlega!

Annars er ótrúlegt hvað mér líður sjúklega vel þegar ég borða hvorki kjúlla né kjöt í kvöldmat... Þess vegna verður áramótaheitið að prófa eina nýja uppskrift í viku árið 2010 sem að inniheldur ekki neitt kjöt. Er ekki málið að gera þetta smá ögrandi og lofa að blogga afrakstrinum í hverri viku?

Í dag ætla ég svo að baka vegan peakan-súkkulaði köku sem (ef vel tekst til) mun verða eftirrétturinn á aðfangadagskvöld á mínu heimili (ehh.. eða mömmu heimili réttara sagt). Jibbý!

Aumingja Einar hafði ekki hugmynd hvað hann var að koma sér út í þegar hann byrjaði með mér!

Hollari skúffukaka

Í vinnunni í dag fékk ég allt í einu sjúklega löngun í gömlu skúffukökuna hennar mömmu. Ég hringdi á Háaleitisbrautina og fékk uppskriftina. Hún lítur svona út:

Skál 1:

-200 gr mjúkt smjörlíki
-3 bollar sykur
-2 egg, eitt í einu
Þetta er þeytt saman.

Skál 2:

-4 bollar hveiti
-2 msk kakó
-2 tsk natrón
Þetta er hrært saman

Skál eitt og tvö er síðan blandað saman og 3 bollar mjólk líka. Þetta þarf að hræra varlega. Kakan er sett í smurða skúffu og bökuð við 170°í 40 mínútur.

--------------

Mér leist ekkert allt of vel á þessa uppskrift svo að í minni útfærslu var smjörlíkinu skipt út fyrir kókosolíu, í staðinn fyrir 3 bolla sykur var settur einn bolli agave (ég nota bollamál svo þetta er stór bolli), í staðinn fyrir hveiti setti ég 3 bolla hvítt spelt og einn bolla gróft og í staðinn fyrir mjólkina setti ég 1.5 bolla haframjólk. Plötuna smurði ég svo með kókosolíu og bakaði kökuna í 37 mín.

Ástæðan fyrir því að ég setti minni mjólk er sú að agave sírópið + kókosolíu blandan er miklu blautari í sér heldur en sykur+smjörlíki. Önnur ástæða fyrir því að ég þurfti svona lítið gæti verið að í dag er rigning í Svíþjóð og spelt er einstaklega viðkvæmt fyrir raka.

Í kreminu var svo hrár flórsykur (flórsykur búinn til úr hrásykri) sem ég sigta saman við kakó og svo hræri ég kaffi út í. Í lokin er best að strá smá kókosmjöli yfir. Nammi, namm!!

Kakan heppnaðist rosa vel (fattaði reyndar þegar ég skrifaði uppskriftina upp hér að ofan að ég setti of lítið natron svo að hún lyfti sér ekki eins og hún á að gera... redda því næst). Næst held ég samt að ég setji aðeins meira agave síróp á kostnað kókosolíu/mjólkur. Restina ætla ég svo að nota til að heilla nágrannana upp úr skónnum, það eru nefninlega haustþrif í garðinum í fyrramálið en ég verð að læra ;-)

 

Nammigrís

Ég er búin að vera í semí sukki síðan í Indónesíu. Það eru sko kominn einn og hálfur mánuður síðan við komum heim. Síðan þá erum við reyndar búin að vera í bæði BNA og á Íslandi með tilheyrandi sukki...

En málið er samt að það eru komnar 3 vikur síðan við öðluðumst eðlilegt líf aftur hér á Götgötunni en ég bara virðist ekki vera að hrökkva í gírinn. Nammi skápurinn er bara búinn að vera að öskra á mig upp á dag! Kannski ekki beint skrítið þar sem að ég á kærasta sem að hamstrar nammi. Einari finnst ekkert erfitt að kaupa nammi og GEYMA það til betri tíma... segjum föstudagskvöld. Ég aftur á móti kann ekki svona. Kannski ekkert skrítið þar sem að við eigum allt þetta hér!!

N.b. þetta er sko ógeðslega mikið!! Ofan í þessum kassa er ég búin að troða öllu (næstum öllu allavega) namminu svo að það sé pínu meira effort að komast í þetta. (Klósettpappírinn og kampavínsglös í sömu hillu... er það ekki þannig líka hjá ykkur?)

Ég kom líka með þá hugmynd um daginn að setja allt nammið niður í geymslu. Ég er nefninlega pínu hrædd við geymsluna okkar. Kjallarar í 150 ára gömlum húsum eru ekki vænlegir til vinnings fyrir myrkfælna! Og ef ég myndi stelast niður myndi ég hvort sem er brenna því öllu á leiðinni upp aftur.

En allavega. Mér líður svona eins og ég sé aðeins að detta í gírinn aftur, ekki seinna vænna þar sem að það eru amk 3 sumarleyfiskíló á mér í október... inte bra! Í tilefni af því að ég er í gírnum ákvað ég að skella í bæði prótínbari og bananamuffins í kvöld. Svona til að eiga í frystinum sem seinniparts snarl. Mér finnst nefninlega ekki hægt að taka ávexti með sér í skólann sem seinniparts snarl, þeir eru bara volgir og vondir klukkan þrjú. Það er aftur á móti ekki hægt að segja um muffin/prótínbar sem er búin að vera allan morguninn að þiðna í töskunni og er fullkomin/nn með nýlöguðu kaffi yfir bókunum!

Það eru tvær síður sem að mér finnst alltaf frábært að lesa þegar ég þarf smá inspiration hvað varðar hollar uppskrifti. Síðan hennar Sollu og CafeSigrún (ég bakaði einmitt muffinskökurnar af síðunni hennar Sigrúnar, mæli með þeim). Í dag rakst ég svo á aðra síðu sem að Klara vinkona mín benti mér á en það er bloggið hjá henni Elínu Helgu, frábært blogg með einföldum uppskriftum og miklum innblæstri. Þaðan fékk ég uppskriftina af prótínbörunum. Breytti henni reyndar pínu en þetta kom rosa vel út.

Einu sinni fór ég í nammibindindi í marga mánuði, minnir að það hafi alveg verið heilir þrír... núna ætla ég ekki að gera það en er ennþá að íhuga að færa kassann góða niður í geymslu.

Pólitík og pönnukökur

Ég er búin að kjósa. Við Einar fórum í sendiráðið á fimmtudaginn og settum x-ið okkar á réttan stað. Ég var reyndar pínu hissa þegar ég komst að því að við áttum sjálf að póstleggja atkvæðunum okkar á okkar eigin kostnað í almennan póst. Ég var viss um að öll atkvæðin frá Svíþjóð færu með einhverjum ægilega treystandi starfsmanni sendiráðsins með flugvél til Íslands... Við vonum bara að þetta komist til skila í tæka tíð.

En já. Ég er aðeins búin að vera að velta fyrir mér hvort ég ætti að skrifa kosninga áróðursblogg. En eftir að hafa hugsað þetta í svolítinn tíma þá er ég búin að komast að því að það er nóg að spyrja sig einnar spurningar áður en gengið er inn í kjörklefann. Það eina sem fólk þarf að spyrja sig að er: "Er ég tilbúinn til að sleppa því að kanna hvaða kosti ESB aðild hefur upp á að bjóða?". Ef svarið er "nei" þá er bara einn bókstafur sem þú getur sett atkvæði þitt við og það er S-ið. Ef svarið er "ehh já. Mér er skítsama um ESB... en það er af því að ég elska verðtryggingu og svo finnst mér íslenska krónan svo sæt. Ég er hvort sem er flughrædd/ur og þarf bara að nota minn gjaldmiðil í mínu landi! Auk þess tek ég það ekki í mál að Ísland missi fullveldi sitt... ég meina sjáiði Frakkaland. Stjórnar engu sjálft!" þá máttu setja x-ið þitt hvar sem er.

Þá er kosningaáróðri mínum á þessu bloggi lokið í bili.

En þegar þú ert búin/nn að kjósa á laugardaginn þá mæli ég með að skella í þessar meinhollu og MJÖG svo ljúffengu amerísku pönnukökur. Eftir að ég birti myndina í síðustu viku hef ég fengið nokkrar beiðnir um uppskriftina svo að hér kemur hún. Uppskriftin kemur af síðunni hennar Sollu en ég breytti henni smá.

Himneskar pönnukökur:

1 1/2 b gróft spelt
1/2 b tröllahafrar eða venjulegt haframjöl
1 msk vínsteinslyftiduft
1 tsk himalaya salt
1 1/2 b haframjólk eða önnur mjólk
2 egg
1/4 b kaldpressuð kókosolía
2 msk agavesýróp eða hrásykur
smá kókosolía til að steikja upp úr

1. Hræra þurrefnunum saman og svo er öllum vökva bætt útí.
2. Steikt á pönnu m. smá kókosolíu.
3. Berið fram með hlynsírópi og fullt, fullt af ferksum ávöxtum.
4. Enjoy