Margrét Rós

Tvö ár í dag

Í dag er ég búin að búa með mínum frábæra unnusta í tvö ár í Stokkhólmi. Og í dag hélt ég minn fimmta fyrirlestur á sænsku fyrir framan fullan sal af fólki. Ég kann núna að borða Skagenröra, pytt i panna, lingon og Västerbotten pie. Já Svíþjóð er svo sannarlega að fara vel með mig!

Eitt ár í gær

Í gær var eitt ár frá því að Einar fékk heilablóðfall. Fyrir þá sem þekkja okkur og hafa ekki lesið bloggið hans um þessa ótrúlegu en fáránlegu lífsreynslu mæli ég með þeim lestri ekki seinna en strax. Á þessu ári er lífið búið að leika við okkur, ég hef algjörlega skipt um skoðun á því hvað skiptir máli, maður á að lifa núna ekki bara plana lífið. 

Sem betur fer tók þetta stuttan tíma hjá honum Einari. Hann þurfti reyndar að vera með þennan sjúklega heita lepp í nokkra daga og átti semí móðursjúka kærustu í nokkrar vikur en svona fyrir utan það þá var þetta búið eins fljótt og þetta byrjaði. Eða svona næstum... Einar hefur alltaf afsökun ef hann missir eitthvað eða skellir hurðum of harkalega, hann getur ekki að þessu gert, hann fékk heilablóðfall :-) Að sama skapi get ég troðið ofan í hann rauðrófusafa... hann má aldrei setja út á heilsubullið í mér, hann fékk nú einu sinni heilablóðfall. Eftir þessa lífsreynslu segi ég alltaf það sem að mér finnst, ekki að ég hafi verið neitt ofsalega hlédræg þarna á undan en samt... ég er búin að breytast og til hins betra held ég.

Í tilefni af því að það er ár liðið frá þessum óskunda ætlum við að skella okkur til Egyptalands á morgun. Við ætlum að kafa, vera ástfangin, skoða pýramída, drekka myntute og ríða úlfalda.

eftir yoga

Yndislega yoganámskeiðið mitt heldur áfram og ég er bara að verða ansi hreint góð. Fyrir utan augljósa kosti þess að stunda yoga (styrkur, liðleika, sef betur, slaka á osfrv.) var ég líka að vonast eftir því að líða aðeins betur í hnénu mínu og geta þá hugsanlega hlupið eitthvað í Sumar-Stokkhólmi. Og viti menn. Um daginn gat ég hlupið í 11 mínútur á ágætis ferð án þess að finna nokkuð, en það er um 10 mínútum betur en fyrir yoganámskeiðið! Með þessu áframhaldi get ég hlupið hringinn í kringum Södermalm í ágúst.

Eftir þessa yndislegu tíma finnst mér best að drekka þetta:

 

og

svona.

Þvílíkur unaður!  Mér líður bara eins og endurfæddri manneskju eftir þetta kombó, yoga, te og kókosvatn. Svo er bara að krossa putta og vona að yoga geri mig líka betri í stærðfræði. Próf á laugardaginn eins og vanalega (fæ illt við tilhugsunina að laugardagspróf séu komin upp í vana!).

Innflutningspartý 2.0

Síðustu helgi héldum við loksins formlegt innflutningspartý hér á Götgötunni. Í fyrstu var áætlað að halda partýið fyrir ca mánuði síðan en þá náði ég mér í flensu svo að því var frestað. Laugardagskvöldið stóðst alla pressuna, bæði þá að þetta væri taka tvö og að við höfum búið í íbúðinni í næstum eitt ár.

Partíið stóð langt fram á nótt og mættu m.a. miðaldra nágrannar af neðri hæðinni í eitt hvítvínsglas. Hresst lið í þessu húsi maður! Einn vinnufélagi minn fékk líka að gista í gestaherberginu þar sem að hann átti að mæta í vinnuna hér í (næstum) næsta húsi klukkan átta um morguninn. Klassík!

 

Food Inc.

Á laugardagskvöldið fyrir viku (þegar ég ætlaði að vera að drekka Bailey's og fara í partý) horfðum við Einar á Food Inc í gegnum iTunes.

Vá ég var ekki að höndla þetta. Ég fékk sko í alvörunni tár í augun við að horfa á þessa mynd. Hingað til hef ég alveg verið ágætlega dugleg að kynna mér matariðnaðinn. Ég hef lesið endalaust á netinu og svo nokkrar bækur líka. Fyrst byrjaði ég á því að horfa á Meet Your Meat, heimildamynd PETA um kjötiðnaðinn í USA í leikstjórn Alec Baldvin. Ég borðaði ekkert sem kom af dýri í einhverjar vikur. Síðan taldi ég mér trú um að ástandið væri ekki eins slæmt í DK (bjó þar þá) og fór aftur að borða ost, kjúkling og fisk. Þetta borðaði ég samt allt í hófi.

Þegar ég flutti aftur heim til Íslands þá slakaði ég aðeins á í þessu og fór að trúa því að ástandið kæmist ekki í líkingu við það í USA. Það er auðvitað rétt en samt sem áður var ég ótrúelga oft farin að borða bara meðlætið ef um rautt kjöt var að ræða og pantaði mér oftast fisk eða grænmetisrétti á veitingahúsum. Síðan eru liðin nokkur ár og er ég búin að lesa nokkrar bækur um þetta, mismunandi að gæðum en eiga það þó allar sameiginlegt að láta mig hugsa mig tvisvar um áður en ég keypti næst kjöt eða nokkurn annan mat. Það eru nokkrar bækur sem ég mæli sérstaklega með. Food Matters er frábær bók fyrir "byrjendur". Hún fjallar um hvaða áhrif matarræði okkar hefur á okkur sjálf og jörðina sem við byggjum (en fyrir þá sem ekki vita þá mengar matariðnaðurinn meira en t.d. bílar í Bandaríkjunum). Þessi bók er ekki of ýkt, þ.e.a.s er ekki algjörlega á móti kjötáti eða nokkuð svoleiðis. Hún er reyndar ekkert bókmenntalegt afrek en mjög gott lesefni engu að síður og með fullt af girnilegum uppskriftum. Næsta bók, Omnivore's dilemma, er alveg hreint frábær. Hún er svona millistig. Mikið meira af upplýsingum og það er kafað aðeins dýpra í þetta efni. Mér finnst hún hálfgerð skyldulesning fyrir alla þá sem að vilja axla ábyrgð á því sem þeir neyta og vera svolítið með puttan á púlsinum. Þriðja bókin sem ég mæli með, Not on the label, er allt öðruvísi en hinar tvær. Hún fjallar að stórum hluta um aðstæður verkafólks í matariðnaðinum í Bretlandi sem og hversu mikinn skít (bókstaflega) stóru framleiðundirnir setja í matinn okkar. Oj bara. Þessi bók er þó öllu erfiðari lestrar, pínu flókin og meira fræðileg en algjörlega frábær. 

Það er alveg hreint ótrúlegt hvað mörg þessara framleiðslufyrirtækja hafa okkur algjörlega að fíflum! Ef maður dregur þetta saman þá eru flest þessi vandræði í matariðnaðinum til komin vegna þess að neytandinn í dag vill kaupa matinn of ódýrt og fá allar tegundir grænmetis á öllum tímum ársins. Það er svo framleiðendunum sjálfum að kenna að við, neytendurnir, viljum matinn svona ódýran. Framleiðendurnir vöndu okkur á þetta.

En svona til þess að segja hvað mér fannst um myndina þá er hún algjörlega frábær. Hún sýnir margar hliðar á þessu máli, bæði aðstæður verkafólks og bænda, aðbúnað dýrana og auðvitað hversu sjúkt innihald þess matar sem við neytum er orðið. Ég mæli með því að allir taki sér smá tíma í að skoða nánar hvað nákvæmlega er á disknum þínu, hvaðan kom það og hversu mikil áhrif hafði þessi matur á umhverfið og verkafólk. Food inc er ágætis byrjun.

Snjóflóð í Stokkhólmi!

Í Stokkhólmi eru snjóflóð - húsasnjóflóð! Í gærdag var enginn snjór á svölunum okkar, nú er staðan svona:

Þessi óvænta þýða er stórhættuleg, enda búið að loka fyrir tvo af þremur útgöngum út úr húsinu okkar með svona plast löggubandi. Ég fór í ræktina í morgun og labbaði þá bara á miðri götunni til þess að fá alveg örugglega ekki grýlukerti eða tonn af snjó í hausinn! Göturnar eru svo annar kafli, þar eru flóð :-)

Í næstu viku á svo að frysta aftur, mínus tveggja stafa tölur frá og með miðvikudeginum. Þá munu allir ferðast um Stokkhólm á skautum.

Prófa Groundhog day!

Mér finnst ég ekki gera neitt nema læra undir próf. Þetta er orðið pínu þreytt. Ég er föst í svona Groundhog day viku, þeas ég vakna alltaf í sömu vikunni, það er próf í þeirri viku.

Á miðvikudaginn fór ég í eitt erfiðasta próf sem ég hef farið í á minni ævi - tvöfalt efnafræðipróf. Það sem að ég vissi ekki var að ég fékk fjóra tíma fyrir tvö próf sem að hvort um sig átti að vera fjórir tímar. Sökum samskiptavandræða við kennarann minn (ekki mér að kenna, hann kann ekki að segja það sem að hann meinar...og hlær svo bara og segir að ég sé lítill vitlaus útlendingur. Heldur hann að ég skilji ekki sænsku eða.. jú!! Þetta nám er á sænsku svo að ég skil hann alveg) hafði ég ekki hugmynd um að prófið væri fjórir tímar fyrr en tíminn var búinn og prófið tekið af mér. Fyrir þetta próf var ég búin að læra eins og ég veit ekki hvað, liggja yfir blessuðu efnafræðiskruddunum  og fá hjálp frá yndislegum Kemi snillingi, honum Henrik. Ég var vel undir þetta próf búin en komm on ég er ekkert ofurmenni sem rumpar 8 tíma prófi af á fjórum tímum.

Ég hef aldrei áður fallið á tíma og þetta var ekkert sérstaklega góð tilfinning, að geta ekki lesið yfir neitt og ekki reiknað dæmin einu sinni enn. Úff! Ég lýg því ekkert að ég var næstum því farin að grenja þegar kennarinn tók af mér prófið, ég var líka alveg að fara að gráta í lestinni og svo fór ég barasta að grenja þegar ég kom heim! Ég hef ekki hugmynd um hvernig mér gekk en vona bara það besta og einbeiti mér að næsta prófi, sem er á morgun. Laugardagspróf eru ekki alslæm. Maður má t.d. lyfta sér upp um kvöldið og sofa út daginn eftir. Ég hef sterklega á tilfinningunni að þessi helgi verði æðisleg, stutt lærdómspása fyrir næsta próf, stærðfræði. Ég ætla að drekka Baileys, skella mér í partý, sofa út og gera súper hollan og góðan brunch á sunnudaginn. Næstu tuttuguogfjóra tímana ætla ég svo að bjarga geðheilsunni með því að hlusta á þetta lag á repeat!

Svoleiðis

• Þetta er snilldar síða! Hægt er að fletta upp snyrtivörum og fá upp hvaða einkunn þær fá á skalnum 1-10 varðandi skaðleg efni. Tíu er s.s. verst og vörur á skalanum 7-10 eru merktar með rauðu. Héðan í frá kemur ekkert rautt stöff inn á mitt heimili.
• Ég er með sauma út um allt. Ái hvað það er vont. Hvernig ætli það sé að lenda í einhverju alvöru... við erum að tala um fjóra fæðingabletti og ég virkilega finn saumana toga í húðina á mér, það er viðbjóðslega óþægilegt!
• Serrano Sundbyberg opnar á föstudaginn! Jibbý.
• Ég er að fara í próf á laugardaginn. Hvað er með þessa Svía og vera með próf á laugardögum? Ég er bara ekki að fatta þetta. Næstu mánuði er ég í prófum aðra hverja viku. Gaman að þessu.
• Áááiii... í alvöru mér er svo illt í fyrrverandi fæðingarblettunum mínum. Ég reyni að hugsa ekki til þess að eftir tvær vikur, þegar saumarnir verða teknir, á að taka fjóra í viðbót. Jakk.
• Þessir blessuðu fyrrverandi fæðingablettir munu ég þurfa að teipa þegar við förum til Egyptalands. Sólin má nefninlega ekki skína á svona ný ör. Vá hvað ég verð fín í bikiníinu.
• Við eigum von á nokkrum heimsóknum á næstunni. Emil mætir á miðvikudaginn og svo kemur vinkona mín í febrúar. Gaman, gaman!
• Við Einar erum loksins búin að bóka helgi fyrir innflutningspartý. Já ég veit... við fluttum inn fyrsta apríl 2009... en í alvöru við erum bara ekki búin að hafa almennilegan tíma fyrr en núna. Og svo vorum við auðvitað að reyna að safna fleiri vinum ;-). Ég ætla ekki að bjóða neinum úr bekknum mínum.. hohoh.. þau eru öll svo lítil. Ég er ekki viss um að þau fíli svona fullorðinspartý þar sem er ekki trekt eða fatapóker. Djók.

Föstudagspunktar

• Það er farið að hlýna í Stokkhólmi. Ég var í hnébuxum og hnésokkum í dag sem var ótrúlega skemmtileg tilbreyting.
• Það er föstudagur og ég hef sterklega á tilfinningunni að þessi helgi eigi eftir að vera frábær.
• Ég byrjaði á Ashtanga yoganámskeiði í gær. Nú mæti ég einu sinni í viku í einn og hálfan tíma í senn ásamt sex öðrum í frábæran yogatíma í þar næsta húsi. Vá þetta var magnað. Og ég held að yogað sé ástæðan fyrir því að ég svaf eins og steinn í nótt. Ég eignaði mér líka nýju dýnuna hans Einars, vá hvað það munar miklu að gera yoga á almennilegri dýnu.
• Allir í Stokkhólmi ganga þessa dagana í forljótum Bally slabb stígvélum. Ég skil ekki hvers vegna fólk kaupir sér ljóta skó fyrir tug þúsúndir króna. Hér er eins og þessir skór fylgi með kornflex pakkanum, svo margir eru í þessu. Úff!
• Í kvöld er ég að fara í nudd. Einar gaf mér gjafabréf fyrir ári síðan og ég ætla að nota það í kvöld. Luxury spa massage hljómar ekkert allt of illa.
• Að nuddinu loknu ætlum við Einar að fara á grænmetis veitingastað hér í nágrenninu og því næst á Up in the Air. Myndin er búin að fá svakalega dóma svo að þetta verður spennandi.
• EM veldur mér vandræðum. Mega Íslendingar halda með Svíþjóð í handbolta? Ég held auðvitað fyrst og fremst með Íslandi en langar að halda næst með með Svíþjóð. Má það?
• Ég veit ekki hvað er að mér. Kannski er Stokkhólmur að hafa þessi áhrif á mig en ég fíla Bad Romance með Lady GaGa í tætlur. Ég held að það sé heldur ekki í lagi.

Komin heim

Við erum komin heim. Það fyrsta sem við gerðum var að leggja okkur og svo var haldið í sögulega ICA maxi ferð það sem að við keyptum endalaust af mat í frystinn og búrskápana. Ég ætla sko að standa við áður gefið loforð um eitt blogg í viku með nýrri vegetarian uppskrift. Fyrsta færslan mun fjalla um kvöldmatinn í kvöld.

Nýja árið hófst í dag (sbr. síðasta blogg) og ég stóð við annað af mínum fimm áramótaheitum og það var að snooza ekki. Þegar yndislega lampavekjaraklukkan mín vakti mig með sólskini og frumskógarhljóðum klukkan sjö í morgun var ég vöknuð. Ég tók mér reyndar tvær mínútur í að telja í mig kjark til að lyfta sænginni en svo kom í ljós að það var ekki eins kalt í íbúðinni og ég bjóst við. Ég vaknaði úthvíld eftir tæpan sex tíma svefn en það var einungis vegna þess að ég á besta rúm í heimi - mans eigið rúm er einfaldlega best. Nú hef ég s.s. sagt skilið við þennan ósið - Margrét snoozar ekki!

****

Eitt af því sem ég kom í verk í frábæru Íslandsheimsókninni var að taka myndir af Svarta Túlípananum (eða við í ST komum því s.s. í verk). Hinn frábæri ljósmyndari Einar Örn Einarsson tók myndirnar og ég er ekkert smá sátt með þær. Hér kemur ein:

Þetta er búið að vera á döfinni í þónokkurn tíma en undanfarin ár höfum við mjög sjaldan allar verið í sama landi á sama tíma. Loksins tókst þetta hjá okkur. Grótta var samt óvenju köld (þ.e. veðrið) þennan dag og því vorum við nokkuð króknaðar þarna í lokin.  Sesselja er líka pínu eins og hún sé ekki með neina putta á hægri, svo vel er hún búin að pakka sér inn í griffluna sína :-)