Margrét Rós

Góð kvikmynd - Gott sushi

Það er kvikmyndahátíð í Stokkhólmi. Á föstudagskvöldið fórum við Einar og Anna vinkona að sjá myndina The Two Escobars. Heimildarmynd um kókaínkonunginn Pablo Escobar og fótboltastjörnuna Andéas Escobar. Myndin var frábær. Flott gerð og mjög áhrifamikil. Og þrátt fyrir að hún fjallaði mikið um fótbolta þótti okkur Önnu hún alveg jafn góð og Einar. Ég mæli með því að allir sem hafa áhuga á góðum heimildamyndum, S-Ameríku eða fótbolta sjái þessa mynd sem fyrst!

Á fimmtudaginn áttum við Einar svo okkar mánaðalega deit (en fyrir þá sem ekki vita gerum við alltaf eitthvað skemmtilegt í kringum 18. hvers mánaðar því við fórum á okkar fyrsta stefnumót 18. júlí). Í þetta skipti fórum við út að borða á Råkultur og fengum okkur sushi. Vá þetta var gjörsamlega geggjað og ég ætla sko að fara þangað aftur þegar vinir okkar koma í heimsókn frá Íslandi í næstu viku. Ég ætla reyndar ekki að fara nánar út í matinn og upplifunina hér því nú höfum við Einar stofnað blogg sem að á að halda utan um þá staði sem við heimsækjum í Stokkhólmi, svona Stokkhólmsblogg. Þar munum við dæma veitingastaði og annað sem okkur þykir skemmtilegt. Við erum enn ekki orðin virk þar en þetta kemur allt með kalda vatninu.

Yndislegur morgunmatur

no 1: egg í morgunmat eru helg vé á þessu heimili. Ég borða þau heil en Einar notar mest eggjahvítur. Hann vill ekki hlusta á mig þegar ég segi að heil egg eru í alvörunni yndisleg. Allavega.. þau eru alltaf hrærð og steikt á pönnu. Scrambled á fínni íslensku.

 

no 2: Yndislegur smoothie! Einn bolli hindber, 1/3 banani, 2 döðlur, 1/4 tsk kardimommu duft og einn tæpur bolli grænt te (má alveg vera heitt ef maður á klaka) sett í blandarann. Þegar þetta er orðið mjúkt og fínt er tveimur matskeiðum chia fræjum (eða hálfri msk hörfræjum) bætt út í ásamt smá klaka. Jömmí!

The computer says no!

Í kvöld í vinnuni afgreiddi ég enskumælandi par. Kassinn klikkaði eitthvað og þegar ég reyndi að útskýra fyrir þeim vandamálið hrökk þessi lína upp úr mér. Ég reyndi að halda kúlinu en það tókst ekki, fyrst hló maðurinn, svo konan hans og loks ég. Konan táraðist úr hlátri.

Svona getur maður verið óviljandi fyndinn!

Nýi fákurinn og nýja planið

Á morgun rennur SL kortið mitt út. Ég er enn hissa á því að mér hafi tekist að týna ekki þessu korti... ég keypti það sko í janúar.

Allavega... á morgun rennur kortið út og ég ætla ekki að kaupa nýtt. Ég ætla að gerast ENN grænni og láta fákinn duga í suamar. Nýja hjólið mitt er nefninlega snilld og maður er ótrúlega fljótur að komast á milli staða hérna í miðborg Stokkhólms, heimanfrá okkur tekur fullt af hlutum lengri tíma með almenningssamgöngum en hjólandi svo að þetta er fullkomið plan. Ég er líka að íhuga það að kaupa mér ekkert stúdenta lestarkort næsta vetur, það er ágætis sparnaður í því að hjóla frekar. Að ég tali nú ekki um hversu gott maður hefur af því að hjóla í hálftíma í skólann og hálftíma heim. Ég get svo alltaf keypt mér miklu ódýrara kort í janúar og febrúar, þegar hjólafærðin er kannski ekki upp á sitt besta. Ég mun samt kannski halda áfram að taka taxa heim af djamminu… svona þegar fæturnir geta ekki meir.

 

Nokkrir punktar úr góða veðrinu

• Eurovison fór ekki eins og ég bjóst við. Ég var alveg klár á því að Hera myndi lenda í topp þremur. Að ljóshærði konu-maðurinn hafi endað fyrir ofan okkur (sem og ca. 13 önnur hræðileg lög) er bara ekki í lagi.
  
  
  
• Hera fékk ekkert stig frá Svíþjóð. Ég heimta endurgreiðslu fyrir atkvæðin mín 10!
• Kosningarnar á Íslandi fóru hinsvegar (því miður) eins og ég bjóst við. Ég er ansi hrædd um að Reykvíkingar munu komast að því að Besti Flokkurinn er Borgarahreyfingin á sterum. Ég er ekki á móti nýjum framboðum, alls ekki, mér finnst bara lágmark að þeir hafi (alvöru) stefnuskrá.
• Er fjölmiðlafólk á Íslandi upp til hópa fávitar? Í alvöru... megnið af þessu fólki þarf að taka sig saman í andlitinu og spyrja alvöru spurninga og leyfa fólkinu sem það er að taka viðtöl við að svara! Og líka muna að Jón Gnarr er ekki lengur grínisti sem elskar Jesú heldur pólitíkus sem má tækla.
• Ég vona samt heitt og innilega að BF standi sig vel og þá mega allir sem kusu hann segja I told you so við mig.
• Í Svíþjóð er sól og blíða. Ég læri út á svölum þar til að ég er að kafna og fer þá inn og kæli mig smá. Svo fer ég aftur út á svalir.
• Einar bakaði köku áðan. Glútein- og hveitilausa brownie sem ég hef áður bakað. Ég veit ekki hvort þetta fæst á Íslandi en ef ekki þá hvet ég Yggdrasil, Heilsuhúsið og heilsuhillurnar í stórmörkuðunum til að panta þetta. Algjör snilld og líka hægt að gera þær vegan.
  
   
• Ég hlakka svo til að vera búin í prófum að það er ekki venjulegt. Tvær vikur og þá er ég frjáls. Búin með þetta ár og get loksins byrjað í því sem að mig langar til að læra. Men ég ætla að dúxa á næsta ári! Í sumar ætlum við Einar að ferðast um Svíþjóð með Torres og sjá sænskar sveitir og annað skemmtilegt. Við ætlum líka að kíkja til Íslands í byrjun ágúst og fara í göngu með móðurfjölskyldunni.
  
• Pabbi og Vilma komu í heimsókn í síðustu viku. Það var alveg ægilega huggulegt hjá okkur. Ég þyngdist um eitt og hálft kíló.
• Þetta myndband eiga allir að horfa á. Ég veit að fólk á Íslandi og Svíþjóð drekkur úr krananum en við kaupum samt sem áður allt of mikið af t.d. sódavatni. Kranavatn er best fyrir kroppinn og umhverfið. Ok vatn úr lækjarsprænu uppi á hálendinu er kannski betra... svo endilega drekkið það með lófanum ef þið eigið leið framhjá svoleiðis.
  
  
• Crossfit er ennþá að gera góða hluti. Þetta er alveg fáránlega skemmtilegt og ég er fullviss um að þetta í bland við yoga er alveg fullkominn kokteill fyrir minn kropp.
• Einar bauð mér til Íslands og hélt upp á 25 ára afmælið mitt á Kaffibarnum nú í maí. Þetta var án efa besta afmæli sem hefur verið haldið mér til heiðurs. Ég skemmti mér konunglega! Takk elsku allt fólkið mitt á Íslandi, þið eru lang best!
  
  

  
  Ég í afmælisgjöfinni frá Einari. Kallinn kann þetta!
  
  
  Sæti Jón Jökull á Hamborgarafabrikkunni. Hann varð sjö ára föstudaginn.
  
  
  Við á leið í partýið. Ég komin í pilsið sem ég fékk frá mömmu og skónna frá foreldrum Einars.

Próf í sænskri sól

Úti eru um 20°og glampandi sól. Ég sver að þetta er að létta prófalundina. Fínt að læra úti á svölum með vatnsmelónu og kælt kaffi. Ég er að fara í sex próf, en á sama tíma á morgun mun ég bara eiga fimm eftir. Og á svipuðum tíma á morgun verða pabbi og Vilma komin í heimsókn. Eftir efnafræðihressleikan í fyrramálið ætla ég nú samt að lyfta þessu bloggi upp og skella inn nokkrum myndum frá nýliðinni Íslandsheimsókn og koma með almennilegar fréttir héðan úr Sólborginni (nýja heitið mitt yfir Stokkhólm). Þessi facebook pása mín mun án efa gera mig virkari í "alvöru" netheimum.

Þangað til mæli ég með þessari grein fyrir alla þá sem eru að íhuga að kjósa Besta flokkinn, ég mæli líka með nýja Bloodgroup disknum og melónu/lime drykknum hér að neðan.

 Sumar í glasi:

 hálf vatnsmelóna, skorin í bita og svona það helsta af steinunum hent í ruslið.
 tvö lime - afhýdd
 ca 1 dl vatn
 1-2 msk agave síróp (fer eftir hversu sæt melónan er).

  Allt sett í blandara með klökum og drukkið í sólinni. Ef það er ekki sól þar sem þú ert þá er um að gera að loka bara augunum, þessi drykkur gefur sumarhugmyndafluginu lausan tauminn.

 

Torres mætir í hús

á laugardaginn. Ég er svo spennt að ég er ekki viss um að ég eigi eftir að sofa mikið þangað til. Hann og systir hans eru bara tvö eftir, mig langar líka í hana en ég er ekki viss um að Einar höndli meira en einn kött. Auk þess eru tveir kettir pínu dýrir. Ohh hann er bara sætastur!

Torres tíu og hálfs vikna

Með bræðrum sínum.   

Listamannalaun

Hvað er að 61% Íslendinga? Ég er svo hjartanlega ósammála því að listamannalaun séu sóun á skattpeningum íslenska ríkisins að það hálfa væri meira en nóg. Ég er kannski ekki mjög marktæk þar sem að elskuleg móðir mín þiggur listamannalaun núna í fyrsta skipti. En Halla veit hvað hún syngur og fullt af öðrum bloggurum sem benda meðal annars á að listamannalaun eru styrkir sem veitt eru í ákveðin fyrirfram skilgreind verkefni. Fólk "hangir" bara ekki á þessu eins og einhverjum bótum. Mikið væri nú Ísland leiðinlegra ef 61% þjóðarinnar fengi að ráða og allar listir lognuðust út af líka.

Að hlakka til

Það er svo gott að hafa eitthvað æðislegt að hlakka til þegar ég á að vera að læra undir stærðfræðipróf. Eins og til dæmis þetta:

1. Innfluttningspartý 2.0 á laugardaginn.
2. Egyptaland eftir rúmar þrjár vikur.
3. Torres flytur á Götgötuna þegar við erum orðin tönuð og sæt í byrjun apríl.
4. STELPUFERÐ til Köben. Ég og Mæsa ætlum að hitta Gerði í Danaveldi og lyfta okkur smá upp, svona rétt áður en Gerður verður mamma :-) Þar ætla ég líka að hitta elsku Jenný og Elínu.
5. Afmæli í maí... újé!
6. Skólinn búinn = sænskt sumar og sól.

Þetta er allt að koma!

Uppfært: ehhh já ég hlakka líka sjúklega mikið að fá Ásgeir og Huldu í heimsókn um miðjan mars. Vá það er svo mikið skemmtilegt á dagskrá! (sá punktur yrði s.s. númer 2 á þessum lista).

Snjóflóð í Stokkhólmi!

Í Stokkhólmi eru snjóflóð - húsasnjóflóð! Í gærdag var enginn snjór á svölunum okkar, nú er staðan svona:

Þessi óvænta þýða er stórhættuleg, enda búið að loka fyrir tvo af þremur útgöngum út úr húsinu okkar með svona plast löggubandi. Ég fór í ræktina í morgun og labbaði þá bara á miðri götunni til þess að fá alveg örugglega ekki grýlukerti eða tonn af snjó í hausinn! Göturnar eru svo annar kafli, þar eru flóð :-)

Í næstu viku á svo að frysta aftur, mínus tveggja stafa tölur frá og með miðvikudeginum. Þá munu allir ferðast um Stokkhólm á skautum.